Andrea, Dunia, Lara, Marta e Silvia somos Cinco en Zocas, un grupo de pandereiteiras vencelladas dende cativas ó baile a á música tradicional. Todas somos do Grove, por nacemento ou por adopción, e coñecémonos dende nenas por temas relacionados co folclore e a cultura tradicional. Cando crecemos, os estudios, traballos e diferentes cousas fóronnos levando por sitios distintos, ata que, no ano 2016, nos atopamos as cinco de volta aquí, vivindo outra vez no Grove ou preto, e decidimos xuntarnos para tocar e pasar o rato xuntas. Así xurdiu, un pouco por casualidade,
Cinco en Zocas. Ao pouco tempo de estar quedando para tocar, saíunos a posibilidade de actuar no Encontro de Pandereteiras que organiza o Concello de O Grove, en outubro dese mesmo ano, enmarcado dentro do programa da Festa do Marisco. E dende esa nosa estrea, vimos tendo actuacións de xeito habitual.
As pezas que montamos proceden sempre do traballo de recollida, recuperación e difusión da música tradicional. Aínda que é certo que, como somos da opinión de que a música é un ser vivo, suxeito ao cambio, á modificación e sobre todo ao xogo, sempre metemos algo de colleita propia, fuxindo un pouco da mera reprodución de aquelo que interpretamos, tratando de respectar a raíz, pero imprimíndolle o noso propio carácter.
Entre as nosas iniciativas tamén se inclúe a de achegar a nosa cultura aos máis cativos, iniciando un ciclo de aprendizaxe e acudindo ás escolas para realizar exposicións didácticas. Dentro das mesmas, teñen cabida a explicación da orixe desta tradición, os diferentes instrumentos tradicionais galegos, a labor de recollida, a
representación de pezas e a intervención dos nenos e nenas mediante instrumentos cotiáns. O obxectivo é explicarlles, a estes nenos e nenas, que é neles onde vai quedar a responsabilidade de conservar unha importante parte da nosa cultura, a música popular.
